【Emily】周浩鼎湯家驊歌聲獻聖誕

民建聯立法會議員周浩鼎（左）同黨友巫成鋒（右），分別彈結他同搖手鈴合唱《Joy to the World》同大家在家抗疫。（周浩鼎fb截圖）

民主思路召集人湯家驊用濾鏡幫自己加鬚扮聖誕老人。（民主思路fb片段截圖）

【明報專訊】抗疫關係，相信大家好難見到一大班人喺街頭報佳音。民建聯立法會議員周浩鼎喺facebook出片，片中街頭空蕩蕩，佢唱嘅《Lonely Christmas》非常應景。周浩鼎話大家齊心抗疫、冇得開聖誕party，佢好想同大家過開心聖誕，片中佢戴住聖誕帽、彈結他唱Joy to the World送畀大家，黨友巫成鋒搖住手鈴一齊唱。

周浩鼎仲加唱多首《單車》，話呢首歌講爸爸同仔女嘅感情，「唱埋畀個仔聽」。周浩鼎同Emily講，彈結他係以前喺英國讀書嘅嗜好，已經擺低咗好耐，對上一次彈結他係幾年前民建聯會慶。

民主思路召集人湯家驊亦自拍唱歌，並加上一大束鬍鬚嘅濾鏡，同民主思路成員唱Santa Claus is Coming to Town送畀市民做聖誕禮物，呼籲大家「保持社交距離，收窄思想距離」。