【明報專訊】現時公屋輪候時間高處未算高，facebook專頁「專業清算師」噚日發帖文，話團隊早前連續10日派出「清算專員」，每晚8點拍攝同一幢公屋大廈，發現多個單位長期無着燈，懷疑呢啲單位係長期空置。不過團隊無公開呢幢公屋嘅資料，只係話畀大家參考。 每晚拍攝同幢公屋 多單位長漆黑 團隊發動「全民圍捕濫用公屋」，呼籲市民用同一種方法，向房屋署舉報懷疑長期閒置嘅單位。除咗每晚拍攝同一幢大廈，團隊提供咗其他監察方法，包括住喺同一座樓嘅居民檢查相關單位水表有無異樣、信箱係咪長期無人收信等，最好係同層同座嘅居民出手。 建議居民留意水表信箱 翻查紀錄，房屋署2018/19年度公屋空置率係0.7%，符合1.5%以下標準；翻新空置單位平均需要36日，亦低於44日嘅標準。 根據運房局數字，去年截至3月底，全港空置出租公屋單位約有5000幾個。公屋聯會總幹事、房委會委員招國偉就話，房署轄下部分公屋單位會預留作特別用途，例如用作處理調遷個案，部分係不受歡迎單位，所以會有一定數量嘅空置單位作為緩衝。
|
| |
| |
