【明報專訊】區選候選人想盡辦法宣傳，甚至有人「出賣」家中貓貓主子。噚日網上流傳圖片，深水埗又一村候選人劉偉聰(Lawrence)選舉橫額嘅相竟然係隻貓，唔少網民話會投貓貓一票。

Lawrence同Emily講，佢設計咗幾款橫額，包括比較老套嘅大頭相同香港夜景，至於網上流傳嘅橫額照片，相中確係佢主子Dworkin，佢話屋企有兩隻貓，覺得隻貓咁靚應該出吓鏡，個樣亦好能夠畀到大家希望，但咁好反應真係估唔到。咁會唔會帶兩隻主子落街站見吓選民？佢話有義工建議過，但佢有保留，始終家貓可能會驚，亦唔想主子畀咁多人摸。

對手政綱亦有關注動物議題

同區另一候選人係自由黨區議員李梓敬，橫額主題係「還我便利店」，佢嘅政綱亦有關注動物議題，爭取又一村建立寵物角，建議增加區內寵物共享公園設施等。