【明報專訊】財經事務及庫務局政治助理楊寶蓮(圖)同Emily講，自己開住電視不停留意修訂《逃犯條例》最新消息，又大讚走喺衝突前線嘅記者「好勇」；原來佢畢業後曾應徵《金融時報》(FT)，想寫有關新興經濟嘅欄目，但無獲聘，佢話望番轉頭，若當年入咗新聞業，條路或會完全唔同。

楊寶蓮中學係10A狀元，之後去美國讀大學主修公共及國際關係學士，佢話一直對新聞好有興趣，細個時已係《明報》讀者；讀大學時亦有參與學生報，但就唔係採訪，而係寫同國際有關嘅評論。佢話當年參與學生報嘅大部分都係美國人，佢係少數嘅華人。