【明報專訊】政府去年《財政預算案》撥款100億元畀科技園公司，部分用來興建科研基建及設施，包括動物實驗室；一向關注動物權益嘅議會陣線毛孟靜，噚日喺財委會特別會議就問到實驗室會用咩動物，同埋興建進度如何。創新科技署長蔡淑嫻話，任何同醫療有關嘅研發，都要做動物藥性測試，當局現時仍在審批研發細則等，未能肯定地回答，但就舉例話最常用嘅動物係白老鼠；如果有眼科嘅研發，有時需要用兔仔；做外科相關研發，就需要用豬。

話說毛孟靜早前書面提問，問到動物實驗室嘅實驗類型、目的等，當時局方回應話，實驗室只會用作做醫療研發工作相關嘅必要實驗，例如藥效試驗、毒性測試等。蔡淑嫻噚日進一步講，要用咩品種嘅動物，視乎研發內容，現時仲係審批緊建議同研發細節，要到知道有邊類研發後，先會知要有咩動物。