【明報專訊】繼鄉議局主席劉業強提出引入野豬天敵限制野豬增長後，噚日大埔區議會上，唔少議員亦提出相關建議。不過，野豬嘅天敵即係咩嘢呢？漁護署高級濕地及動物護理主任張家盛一聽到，就好認真咁話，野豬嘅天敵係獅子同老虎呢啲猛獸，同埋疾病，如果要引入呢啲天敵，風險實在太高，所以唔會考慮。 引入獅子、老虎當然唔得，但要點樣對付野豬呢？張家盛話，漁護署上年初推行避孕及搬遷先導計劃，到年底就捉過130隻野豬，幫其中48隻避孕、6隻絕育。佢話要檢控市民餵野豬係有難度，話會考慮喺餵飼黑點裝攝錄機打擊非法餵飼，同埋已經計劃修改垃圾桶設計，令野豬無得再摷垃圾桶搵嘢食。
|
| |
| |
