【明報專訊】前特首梁振英(CY)噚日出席大灣區論壇，到問答環節唔少人都想請教吓佢。有個博士生話自己做緊研究，提起前特首曾蔭權同CY任內對創科政策有所改變；CY講咗兩句，話鋒一轉又重提當年泛民拉布導致創科局兩度胎死腹中，仲叫嗰名博士生寫研究時，「要將反對派把創科局拉死兩次寫進去」。 來自科大嘅一年級博士生問到，曾蔭權任內對創科政策未見高度重視，CY任內有所改動，原因係乜。CY就話喺佢當選之前，社會思維係「high tech揩嘢、low tech撈嘢」，意指發展高科技會蝕錢，低端科技先賺到錢，直至佢當選後社會諗法有所改變，所以佢認為要推動創科局成立。 CY又話，由佢當選開始已經希望政府可以成立創科局，「結果都被反對派拉布拉死了」，其後政府再次提交議案，但泛民亦拉布，導致未能通過。
|
| |
| |
