【明報專訊】近日政圈流傳前特首、全國政協副主席梁振英(CY)有意回朝，喺2022年特首選舉捲土重來。空穴來風，或者係因為CY呢排經常化身時事評論員，例如喺facebook炮轟香港外國記者會請香港民族黨召集人陳浩天演講；而另一邊廂，有建制派開始批評特首林鄭月娥。全國人大常委譚耀宗噚日喺電台被問到呢個傳聞，就話「捕風捉影嘅嘢無需要」，「等於問我會唔會返去選立法會，我都已經做緊唔同層面嘅嘢」。 笑問主持係咪唔鍾意CY 譚耀宗估計，CY接受咗做政協副主席，位居國家領導人級，睇唔到會返轉頭選特首。至於內地官場文化係咪上咗另一層級，就一定唔會落番嚟，佢解釋，內地官員晉升同調職都係中央決定，不過「我哋呢啲唔係，你想去參選，咁去參選囉」。咁CY想回朝嘅傳聞有幾可信呢？譚耀宗話佢冇聽過CY有呢個諗法，不過就估計呢個傳聞源於CY好積極發表意見，以佢對CY?認識，CY工作一向熱情，係「唔停得」嘅人。 但譚耀宗都未有斷言CY一定唔會再選特首，只係話唔需要就呢啲?評論，又笑問主持﹕「你唔鍾意佢(CY)咩？」
|
| |
| |
