【明報專訊】基因編輯研究發展得好快，最近就有科學家利用基因編輯技術，成功喺實驗室阻止傳播瘧疾嘅瘧蚊繁殖。問題亦隨之而來，基因編輯技術係咪可以用喺生殖細胞，甚至喺胚胎度做實驗呢？倫敦皇家學會、美國國家科學院同美國國家醫學院就同港科院合作，11月27至29號喺港大舉行國際峰會，討論基因編輯技術、應用同埋研究道德，港科院院長徐立之仲透露會特設科普專場，歡迎公眾參與。 徐立之同Emily講，峰會第一屆喺美國華盛頓舉行，今年第二屆原本嗰幾個搞手係諗住搵中科院搞，但係中科院話「峰會」係「國家」先搞得，所以拒絕咗；咁啱現任美國國家醫學院院長曹文凱原來係香港人，就二話不說轉搵港科院，仲即刻搵到好多本地星級科學家幫手，包括科大葉玉如，同埋中大盧煜明、陳偉儀同沈祖堯等。徐立之話，當特首林鄭月娥知道有呢個國際級活動，仲粒粒皆星，就話請大家食飯，非常開心。 如果大家有興趣參與科普專場，可以上以下網址報名：https://goo.gl/L9J7fE
|
| |
| |
