【明報專訊】民陣今年將趁十一國慶日搞遊行，追究港鐵沙中線工程問題，早前宣布呢個月會去建制派主要政黨嘅總部示威「狙擊」，抗議建制派拒絕以特權法調查沙中線。民陣噚日以第一大黨民建聯作為首個狙擊目標，一行十幾人打算去民記北角總部請願，但被大廈保安截於地下大堂外，警方更嚴陣以待，派出近20個便衣同軍裝警員戒備，仲多人過請願者。 長毛帶道具諷「蛇鼠一窩」 民陣、社民連及積極考慮參加九龍西補選嘅劉小麗，噚日由炮台山港鐵站步行至民記所在大樓地下，沿路高叫「拒絕危城」、「不要豆腐渣工程」同「動用特權法，徹查沙中線」等口號。社民運梁國雄(長毛)帶埋蛇同老鼠道具，諷刺民記「蛇鼠一窩」，批評民建聯喺立法會有最多議員，但多次反對以特權法查沙中線。 劉小麗形容，沙中線事件反映香港制度沉淪，民主派過去一個月收集逾1萬個市民簽名，要求立法會以特權法調查，佢要求調查過程要公開聆訊，相關文件亦要公開。民記噚日派職員接收請願信後，請願者和平散去。 有傳媒噚日話民陣帶頭搞示威，但召集人葉志衍噚日唔見影，民陣就特別發聲明，回應話葉志衍因為前年反釋法遊行被檢控，必須出庭應訊，所以未能參與行動，民陣協調後就安排副召集人梁穎敏統籌噚日嘅狙擊行動。
|
| |
| |
;){kind=small}
