【明報專訊】前特首梁振英(CY)多次向政界人物、學者同傳媒機構發律師信，指控佢哋有關UGL案嘅言論失實，包括入稟高院控告理大學者鍾劍華嘅文章涉誹謗；對於CY頻發律師信，一向同佢唔咬弦嘅自由黨榮譽主席田北俊，形容若CY真係如佢所講無問題，就唔需要咁擔心其他人調查佢嘅事，相信CY係眼見學者「無佢咁有錢」，故發律師信要求道歉或者打官司咁話。 田少噚日接受民主黨前主席劉慧卿網台節目訪問，節目後佢被記者問到，點睇CY近期就香港外國記者會(FCC)邀請民族黨召集人陳浩天演講一事高調發聲，田少話，相信CY擺出高姿態，係要畀北京睇到佢比特首林鄭月娥更政治正確，因林太只係話「遺憾」。田少覺得，如果唔係CY搞到咁大陣仗，可能陳浩天講嘢都無咁多人聽。 對於校園應否「講獨」，田少喺節目上話學生就港獨議題「講嘢、去研究吓，係無大壞」、「畀佢哋自己傾傾無壞」，可以討論獨立嘅好處同壞處，但佢認為學生咁做，中央會唔啱聽，港府亦會難做。 兩年後自由黨料不派人直選 對於自由黨發展，田少承認，現時嘅政治環境，直選對自由黨而言較困難，因為少咗選民支持中間立場，該黨嘅地區工作「冚晒旗」，加上黨內無政治明星，所以田少話自由黨喺2020年嘅換屆選舉，好大可能唔會派人出戰地區直選，即使出選都係「意思意思」。
|
| |
| |
