【明報專訊】九巴噚日話炒又唔炒罷工車長事件峰迴路轉，搞到好大件事，唔同黨派嘅議員、立法會補選候選人都湧去九巴車廠關注事件。社會福利界議員邵家臻就話，其實佢都算係九巴「養大」嘅，話爸爸喺九巴做咗20多年，好念舊，喺彌留之際，仲叮囑家人要放一套九巴技工制服陪葬！受到爸爸影響，阿臻自認算係「巴膠」，但佢話見到九巴今次炒車長咁離譜，相信如果阿爸在生，都會同佢一樣，送上一堆粗口贈興。
阿臻同Emily講，爸爸5年前去世，生前係九巴維修技工，一做20幾年，佢話爸爸退休時先知道，有10多年嘅工作時間原來被當「散工」看待，退休金只有十多廿萬，但佢話老爸仍然冇埋怨，形容爸爸呢一代人，有飯開、唔再飄泊，已經覺得係大恩大德。
父當九巴技工20多年
阿臻話九巴今次炒車長事件係「惡行」，話「人神共憤」。佢話自己受到爸爸影響，對九巴都有微妙感覺，間中都有買九巴模型，但今次事件後，阿臻話會停買模型以示不滿。
