【明報專訊】全國政協常委會噚日閉幕，除咗通過新一屆政協委員名單，Emily聽聞，會上亦定咗3月兩會政協會議嘅議程。立法會補選將於3月11號舉行，政府未確實有關日子時，唔少建制派特別係人大代表同政協委員，都極力要求政府改期，認為地方補選唔應該同國家會議撞期，最終選管會企硬，鐵定3．11補選；唔知係咁啱得咁蹺，定係國家都考慮補選問題，據聞兩會期間，3．11正係政協委員「休息」日，莫非要遷就港區政協們飛返香港投票或助選？ 由於今年正值中央領導人換屆，所以今年3月嘅兩會會期都會較往年長，Emily聽聞，今年政協會議依舊於3月3號下晝開幕，到3月15號上午先閉幕；至於人大會議嘅會期就更長，由3月5日開幕開到20號先結束。根據慣例，兩會期間，人大、政協都會有一天休息日，即係當日唔會有會議，而今年政協就將休息日定於3．11。 人大休息日未知 至於人大方面，有人大代表稱，暫時未知邊日放假，但透露部分人已向有關當局反映，究竟能否成功爭取，3月自有分曉。
|
| |
| |
