【明報專訊】坐落香港迪士尼樂園12年嘅睡公主城堡，下年1月初開始就會擴建，因應工程，煙花匯演喺下年1月1日完咗之後就要暫停一段時間喇。告別煙花前，樂園噚日起開始一連串慶祝聖誕嘅活動，請咗9隊社區合唱團，喺城堡前唱聖誕歌，獲邀嘅包括患有語言障礙同患癌嘅小朋友，希望可以提高佢哋嘅自信心。

今年樂園亦增設「米奇與好友聖誕舞會」表演，一眾迪士尼老友記都會著住聖誕服飾，喺城堡前又唱又跳，表演期間仲會噴雪花𠻹，都幾有聖誕氣氛㗎。表演每日有兩至三場，都係去到下年1月1日。

香港迪士尼早前推出「香港人多D Fun」大抽獎，免費送出5萬張門票，報名噚日截止。截至噚日中午12點，已經約有100萬人報名。