【明報專訊】中大博群計劃嘅無止橋學生團隊喺暑假時，同理工大學、上海同濟大學及昆明理工大學合作，去到雲南省文山州八嘎鄉六主村，幫一班村民修建32米長嘅行人橋同30米長嘅行人引道，方便佢哋返學同耕種，中大校長沈祖堯都有跟埋去幫手。

話說六主村中間有條八嘎河，村民一定要經行人橋先去到另一邊，但條橋因為日久失修，已經嚴重變形，村民每次行過都好似搵命搏咁。當雨季到來，河水仲會淹過橋面，村民直頭行唔到，非常唔方便。9個唔同學系嘅學生幫村民諗點樣修橋之餘，仲落手落腳同佢哋一齊築橋。佢哋亦去到一啲長者屋企，幫佢哋鋪固定水管同裝節能電燈，老友記就唔使驚屋企太黑而跌傷。其中讀中大機械工程二年級嘅王子希話，曾經幫一對長者夫婦裝水龍頭，伯伯開心嘅樣令佢好難忘。