【明報專訊】香港最近接連遭受兩個風暴吹襲，政務司長張建宗噚日喺網誌撰文，同大家探討極端天氣同時裝嘅關係。張建宗話香港人消費力強勁，喺2015年每日丟棄嘅衣物平均達306公噸，即係20架雙層巴士重量，估計每個香港人一年棄掉約100件T恤，數量驚人。 估計港人年棄百件T恤 張建宗話，近年「即食時裝」盛行，隔幾日就有廉宜嘅新貨上架，但呢種模式令環境承受負擔，因為時裝同紡織業嘅生產鏈遍及全球，生產過程耗用大量天然資源，釋放化學物質同二氧化碳，影響環境生態，製成品嘅運送過程亦會加深碳足印，而「即食」潮流風氣更導致大量衣物被丟棄，加重堆填區負荷。 張建宗提到，政府已經多管齊下應對氣候變化，至於時裝業方面，香港正研究應用綠色技術，減少時裝對環境嘅影響，例如將廚餘轉化成製衣纖維、可生物降解嘅紡織品，開發紡織物循環再造技術等。佢話呢啲研究唔止係可持續發展，仲可以增加行業競爭力、創造就業機會同新商機，為年輕人開拓發展空間同有利創業嘅環境。
|
| |
| |
