【明報專訊】首集4女嘉賓 講青年政策

港台《城市論壇》主持蘇敬恆盛傳將加入政府擔任食物及衛生局政治助理，而《城市論壇》唞暑大約一個月後噚日復播，主持繼續係蘇敬恆，第一集搵嚟4名女嘉賓，包括青年新政游蕙禎、民主黨成員吳思諾、民建聯荃灣區議員林琳同西貢區議員方國珊，節目討論青年參政空間、青年政策等。蘇敬恆笑言嘉賓有年輕人、有資深人士，而51歲嘅方國珊就笑言自己仲係青年。

城壇噚日開始前半個鐘有個簡單儀式宣布節目復播，唔少論壇常客一早到場，部分更同蘇敬恆握手，唔知係咪恭喜佢或者會入政府呢？不過，蘇敬恆被問到係咪會做政治助理時，只係話未有最新消息可以公布，咁日後節目係咪會換主持？佢就話如果有需要，會有同事頂上、替補做主持。

陳月慧到場偷師？

不過，盛傳一旦蘇敬恆離開港台就會接手主持城壇嘅傳媒人陳月慧，噚日全程喺維園睇節目，唔知係咪到場偷師？

講番噚日節目，4個女嘉賓都一致認為政府目前用嘅諮詢模式守舊，應該要變，泛民就關心政府即使諮詢聽意見，日後會唔會態度照舊，游蕙禎更話今日嘅激進行動係被政府逼出嚟。吳思諾就建議政府成立青年議會，聽吓年輕人聲音並跟進青年議會通過嘅議案。方國珊則認為要重設市政局嘅架構，呢個建議亦獲游蕙禎認同。

吳思諾噚日係首次出席《城市論壇》，佢係早年患癌病逝「三料議員」吳明欽嘅女兒，思諾話之前都有就青年政策做晒功課先上陣，首次出席呢類活動有啲緊張，但就話節目比想像中平和得多。