電競節可試玩雅達利紅白機 音樂節Festival Zone料吸5萬人次

電競節可試玩雅達利紅白機音樂節Festival Zone料吸5萬人次

[2017.07.26] 發表

【明報專訊】旅發局8月4日至6日(星期五至日)喺紅磡香港體育館舉辦「香港電競音樂節」，當日除咗會有「英雄聯盟王者回歸世界邀請賽」，亦會於紅館外嘅平台搞「Festival Zone」嘉年華，有近20個參展商展示最新嘅電競同電玩產品，其中最經典嘅，莫過於會有1977年版嘅「雅達利」同任天堂紅白機畀市民試玩。市民畀10元就可以入場，大會同時會提供兩張5元現金券，可以喺幫襯場內6架美食車同9個美食攤檔時使用。

旅發局節目及旅遊產品拓展總經理洪忠興預計整個音樂節連同「Festival Zone」可吸引5萬人次到場，當中約有一成會係旅客，佢又話「Festival Zone」會有6個展館同13個展商帳篷，畀市民了解同體驗唔同電玩，當中由經典至全新嘅電玩都有，例如有虛擬實境遊戲同紅白機遊戲擂台等，大會仲邀請多個網絡紅人同台對決。已經購買音樂會門票嘅市民，當日可以憑門票免費入場。

推動玩舊電子遊戲嘅組織「Retro.HK」都會參展，佢哋到時會帶同多部經典遊戲機畀市民「挑機」對決，當中包括1977年版嘅「雅達利」、任天堂紅白機同超級任天堂等，市民玩呢啲遊戲機時就可以「回到過去」，玩到例如「超級馬里奧兄弟」、「食鬼」、「炸彈人」同「街頭霸王II」等經典遊戲。