曾俊華讚新政府開局好
[2017.07.26] 發表
【明報專訊】前財政司長曾俊華自3月特首選舉落敗後，噚日接受商台訪問，佢笑言現時無官職在身，「可以講番自己想講嘅嘢」，形容自己輕鬆咗，因為做官時要代表政府、政策講嘢，立場必須清晰一致。
或搞NGO推廣「希望」
特首林鄭月娥上場近一個月，曾俊華就話新政府開局好好，無做過加劇社會撕裂嘅事，佢話社會撕裂仍然存在，而修補撕裂係一個過程，需要好多市民信任，政府須展示誠意及真心同市民溝通。佢話競選期間提過「希望」嘅概念，盼望年輕人有「希望」，未來會着手研究呢個方向，仲話如社會有需要，唔排除自行開辦非政府組織(NGO)推展有關概念。
本港年輕人受向上流問題困擾，曾俊華話上一代「向上爬」需要付出大量努力先有成果，「後生仔成日話要向上流，但世界上有地心吸力㗎嘛，點會向上流呢？我們以前成日了解係向上爬，每一步都係艱辛，要慢慢行、要付出努力」。
更多港聞
【明報專訊】香港大學民意研究計劃噚日發放最佳公共交通機構評分，結果發現市民最熟悉嘅公共交通機構係九巴，但評分調查方面，港鐵表現最好。民研計劃...
詳情
相關新聞
