【明報專訊】眼利嘅網民經常發揮監察作用，特別喺「認字」方面，今次就發現參選高等教育界選委會選舉嘅兩名教授，港大經濟系講座教授王于漸同中大經濟系兼任教授宋恩榮亦「老貓燒鬚」，喺候選人簡介入面串錯自己職業名！ 王于漸同宋恩榮屬「香港重建」名單，佢哋以中文報稱自己係「大學教授」，英文就寫住「UNIVERISTY PROFESSOR」，串錯咗UNIVERSITY。噚日有人發現後喺facebook專頁分享，有網民「溫馨提示」，兩教授用電腦時可開自動修正(autocorrect)，咁就唔使蝦碌。 fb致歉話「University被人搞亂了」 「香港重建」即刻以「您真係細心！是的，University被人搞亂了！」為題，喺fb參選專頁致歉，話係因「手民之誤」。發言人就同Emily講，相信係同事copy & paste下連番串錯，名單上嘅另外兩學者雷鼎鳴同廖柏偉，因為英文只填「PROFESSOR」就無事，希望唔會因為今次件事影響選民投票意欲。Emily就好奇，致歉帖文用「University被人搞亂了！」為題，好易引嚟聯想，發言人就話只係用番年輕網絡語言，仲話Emily「諗多咗嘞」！ 選委參選名單詳見網頁： bit.ly/2fp3yYk
|
| |
| |
;){kind=small}
