【明報專訊】青年新政立法會議員梁頌恆因為宣誓時「支那」嘅讀音搞到滿城風雨。梁頌恆喺香港華仁書院畢業，「華仁」校友、番禺會所華仁小學校長陳岡，就向梁頌恆發信，強調母校無教過梁將China讀成「支那」，仲話如果梁讀呢個詞語有口音，「華仁英文老師必然已幫你戒掉」。 陳岡喺信中話，明眼人一睇就知梁頌恆嘅政治主張係咩，質疑梁點解唔敢將自己嘅主張堂堂正正講出嚟，然後承擔後果？陳岡批評梁閃縮，希望佢臨崖勒馬，「以華仁教你的價值，以尊重自己、尊重他人的方法，重新宣誓」。 另外，多個從事歷史文化及教育工作，以及自稱關心香港社會嘅人士發起聯署，要求梁頌恆同游蕙禎向全港市民，以及全球華人嚴肅道歉，仲要收回有關言論。聯署發起人包括香港歷史博物館前總館長丁新豹，參加聯署嘅就有全國人大常委范徐麗泰、港區全國人大代表劉佩瓊、港區人代譚惠珠，以及民建聯譚耀宗等。
|
| |
| |
