【明報專訊】新一屆立法會選舉9月4日舉行，今屆立法會會期則去到7月16號，由於今年係選舉年，所以16號後立法會就要停止運作，直至選舉結束。立法會行政管理委員會噚日開會，會後曾鈺成話，為免現任議員喺立法會換屆選舉期間有不公平優勢，所以7月16號至9月4號期間，雖然議員辦公室可繼續使用，但大樓內公眾地方、開會地方都唔應該用作與競選有關活動，如見選民等，議員亦唔應該利用大樓設施見傳媒。 為免現任議員有優勢 曾主席話，呢個限制適用於所有現任議員，不論佢哋係咪競逐連任。民主黨主席劉慧卿就話，呢個唔係新安排，大家都接受，明白係為咗防止現任議員有特別優勢。 另外，行管會上次開會後，就有傳媒報道，行管會成員馬逢國會上提到記者喺會議廳外進食有礙觀瞻，引起唔少反響。曾主席就話，噚日會上都有討論呢個問題，佢話行管會屬閉門會議，內容唔應該向外透露，對於有人不守規定，行管會表示非常不滿，予以譴責，又話如經常有人泄露會議內容，就會影響行管會處理議題。
|
| |
| |
