【明報專訊】特首梁振英(CY)被指向機場職員施壓嘅「行李事件」引發軒然大波，同時掀起抽水熱潮。教育界立法會議員葉建源噚日喺facebook分享「經驗」，話自己最近都遇到相同情况，笑言如果當時有講「叫我葉議員」，行李或者毋須經過安檢就可以自動送到喇。 事緣葉建源當時入咗候機室，先發現漏咗件手提行李喺check-in櫃枱附近，當時機場人員叫佢親身返離境大堂攞番件行李，然後做多次離境同檢查手續。佢依指示攞番行李，一來一回用咗大半個鐘，好彩航班延誤先趕得切上機。葉建源笑言，喺特首「行李事件」發生之前，仲以為重新辦手續係唯一方法𠻹。 立法會兩名姓梁嘅泛民議員同樣湊熱鬧抽水。公民黨梁家傑建議梁振英改名做「梁特首」，就算對方他朝唔做特首，其他人都要用呢個稱呼。會計界梁繼昌噚日去快餐店食飯亦不忘諷刺梁振英，話自己唔會要求人稱呼佢做「梁議員」，其實同市民一齊排隊同搭枱食飯都好舒服嘅。 食店送「梁特手」雞翼招徠 除咗政界，飲食業噚日都藉「行李事件」喺facebook大力宣傳，心燒食堂話顧客落單時只要高呼「叫我梁特首」，就送一隻「梁特手」雞翼；Neway卡拉OK「小編」就擔心，客人將來會唔會都要求職員用職位稱呼呢？
|
| |
| |
;){kind=small}
;){kind=small}
