【明報專訊】年屆70歲嘅全國人大常委范徐麗泰，下屆就會退任人大，不過佢都無諗住畀自己放鬆一下，去年9月起已密密籌備辦教育中心，搞吓國情班、交流團，仲邀請唔少重量級人馬同埋退休高官坐鎮。

莫言屠呦呦？ 李明逵﹕有機會都會

雖然范太多次強調教育中心無政治目的，但唔少人都擔心搞呢類交流團係「洗腦」。提問環節，有記者就問負責國情教育部分嘅警務處前「一哥」李明逵，交流團會唔會介紹年輕人認識攞過諾貝爾獎嘅莫言、屠呦呦等人，雖然問題有啲奇怪，李明逵都不假思索話「有機會都會」。不過記者下一句就問到，「咁2010年得獎嘅劉曉波呢？」咁難答嘅問題，李明逵都呆咗一吓，面露難色話「如果有咁嘅機會，我哋都會」。

不過范太其後就補充，本月北京兩會期間，有唔少地方官員都有邀請范太去佢哋自己省市交流，「但係你話我要去監獄探劉曉波，就難啲啦」。

教育中心啱啱起步，喺上環中心租咗1800呎嘅辦公室。雖然中心暫時得4個員工，但就請嚟曾經同范太喺立法會共事過嘅秘書處前公共資訊部主管黃永泰(Simon)做總幹事。