【明報專訊】立法會發展事務委員會剛剛去咗新加坡訪問4日，主要考察新加坡供水政策同海水化淡技術，了解當地政府如何確保飲用水水質。除此之外，考察團成員各自忙裏偷閒，同當地朋友見面。人民力量陳志全就同當地朋友，一齊帶社民連梁國雄去Gay bar見識交談；民建聯梁志祥就同當地朋友一齊考察牛車水大牌檔食肆。

忙裏偷閒 慢必帶長毛去Gay bar

今次考察團有12個議員參加，團長謝偉銓話訪問期間同新加坡政府相關官員，以及海水化淡廠、再造水廠嘅代表會晤，交換意見，了解當地食水處理程序嘅內部監察。謝偉銓話，喺新加坡取得嘅資料好有用，有助議員研究香港政府提出嘅水資源發展政策同措施。

唔少議員日日喺facebook報告行蹤，好似梁志祥就分享海水化淡廠、水質實驗室等參觀行程，連其間考察團嘅旅遊車司機因為太心急撞咗車嘅事都同網友匯報，好彩議員平安無事。人力陳偉業參觀海水化淡廠時，就話希望香港嘅海水化淡可以快啲有新計劃，「港人就唔使再被迫飲東江污水」。