【明報專訊】立法會選舉仲有大約半年就舉行，律師會會長熊運信(Stephen)噚日舉行傳媒茶敘，Emily就把握機會問Stephen有無興趣參選法律界議員，Stephen聞言即刻耍手擰頭，仲大玩食字，話自己只會喺立法會外走來走去(running around LegCo)，但就唔會參選立法會(running for LegCo)喇。對於支唔支持公民黨郭榮鏗連任法律界議員，Stephen未有表態，話律師會有同對方恒常交流，至於對方工作表現就「OK啦」。 熊運信無意選立會 除咗正經事，Stephen席上又分享幾年前去柬埔寨交流嘅見聞。佢話當時向近200個當地律師演講，談及有關貪污嘅法律議題，但佢講完之後，台下第一條問題竟然係「香港有幾多法官收賄」，令到Stephen十分錯愕，只能答無，而台下聽眾亦十分驚訝，話唔畀錢咪所有官司都輸？兩地對法治嘅觀念大相逕庭，Stephen亦笑言，嗰次之後無再收到邀請去柬埔寨演講喇。
|
| |
| |
;){kind=small}
