【明報專訊】今年係立法會選舉年，除咗地區直選面臨苦戰，自由黨唔少功能組別議員都心思思緊想唔想連任。對於連任問題，噚日自由黨同傳媒新春團拜時就個個耍太極，唔肯正面回應。 張新名「兩蚊張」 批發及零售界方剛就話仲諗緊，但就坦言每次交棒都會驚，因為好多人虎視眈眈，有意出嚟爭。而飲食界張宇人(Tommy)可能同樣面對「傘兵」、曾參選西營盤嘅伍永德嘅狙擊。但Tommy話無有怕，但反而怕咗個女。事關佢個女都係飲食界選民，萬一自己真係要選，都擔心被人質疑有利益瓜葛。Tommy笑言，日後同個女食飯，可能都要分開埋單！ 田少唔用長者卡有因 過去因為最低工資而被稱為「廿蚊張」封號嘅Tommy，最近有個新朵「兩蚊張」，因為佢舊年夠資格攞長者卡，可以兩蚊任搭公共交通工具。不過一早已經踏入65歲嘅田北俊就「唔認老」，拒絕用長者八達通。田少話，過閘嘅「嘟聲」同人哋唔同，唔想被人發現！
|
| |
| |
