【明報專訊】「告士打道紅隧方向，龍尾去到夏愨道紅十字會附近。」揸車嘅朋友對呢句說話應該唔會陌生，但係由今日開始，負責報交通消息嘅朋友就可能要改口喇。皆因香港紅十字會喺金鐘嘅總部已經喺噚日正式結束運作，搬去位於西九龍海庭道19號嘅新總部。

位於金鐘夏慤道33號嘅紅十字會總部，1965年開始運作，有成50年歷史，當年紅十字會附近無𠵱家咁多高樓大廈，更加未有政府總部，隔籬係政府直升機停機坪，後面係英軍添馬艦海軍基地，喺樓高3層嘅紅十字會總部，仲可以望到仲喺附近英軍添馬艦碼頭同船塢停泊嘅軍艦。

紅十字會喺正政府總部隔籬，Emily仲記得上年雨傘運動，有好多紅十字會急救員會喺總部附近為傷者提供急救服務。原來紅十字會喺佔領運動期間，破紀錄連續76日提供急救服務，動員急救人員超過1850人次。