【明報專訊】新民黨主席葉劉淑儀新成立咗個「海上絲綢之路協會」，自己做聯席主席，話係支持國家嘅「一帶一路」發展策略。葉太噚日出席電台節目時，主持人形容佢「又參加過直選，又係資深公務員，可獲得公務員支持，仲要推動埋一帶一路，得到埋商界支持，就係參選嘅適合人選」，葉太笑住反問﹕「參選咩？選美應該無行喇！」 主持人繼續追問佢係咪為選特首鋪路，葉太就話海上絲綢之路發展係橫跨幾代，「超過100年，到時我都唔喺度喇」，強調協會同佢個人或2017年特首選舉一啲關係都無，係一心一意希望同中央政府向協會提供嘅專家顧問長期合作，藉一帶一路嘅新機遇，借國家嘅大船出海，等香港可以背靠祖國開發新嘅市場。 行會非官守成員 林煥光唯一過50分 另外，香港大學民意研究計劃公布最新嘅行政會議非官守成員民望數據，林煥光繼續排第一名，有54.3分，係唯一一個評分超過50分嘅行會成員；葉太同李慧琼就排第二同第三，評分有48.1同42.3；第四同第五就係羅范椒芬及李國章，但兩人評分都唔夠40分。調查喺8月底至9月初做嘅。
|
| |
| |
;){kind=small}
