【明報專訊】指CY上任幾年「風波四起」 對特首梁振英嘅是非愈來愈多，全國人大前代表吳康民亦加把嘴。康民叔接受now新聞專訪，話特首梁振英上任呢幾年「風波四起」，所以如果康民叔係中央，佢會覺得由公務員做下屆特首會穩陣啲。佢仲點名睇好政務司長林鄭月娥同財政司長曾俊華，話財爺都有魄力，仲同國家主席習近平握過手。 康民叔話，林鄭「人和」好，做第二把手「得心應手」，但做阿頭就懷疑魄力夠唔夠，而公務員系統幾十年牢不可破，佢哋治港理念好難即刻打破晒，如果有公務員壓住個陣會比較穩定。 質疑林鄭做「阿頭」魄力不夠 前問責官員有無機會捲土重來？康民叔話，前財爺梁錦松睇咗「污水」咁多年，都知好難搞。佢又話前保安局長葉劉淑儀就未必好想做，葉太有半個公務員優勢，但因為大家係好朋友，所以唔方便評論。 康民叔話，立法會主席曾鈺成幾年前曾經同佢講，話有大老細「出面撐佢」選特首，但佢認為對方係老左派，要搵黑材料大把，叫對方千祈唔好做。康民叔認為，𠵱家政局令唔少有能力同有心人窒晒步，所以最終出來嘅特首參選人未必係眾望所歸。
|
| |
| |
