【明報專訊】有團體前日舉辦支持專欄作家屈穎妍遊行，聲援對方被恐嚇滅門，出席嘅包括民建聯立法會議員蔣麗芸，蔣麗芸噚日就喺facebook向記者協會「挑機」，質疑點解記協今次唔出席遊行喎。 蔣麗芸話，上年《明報》前總編劉進圖被襲，記協發起支持言論自由集會，今次支持屈穎妍集會亦係支持言論自由，自己都有出席，但奇怪點解同一訴求，記協竟然「無影」。 記協﹕為何只質疑記協不撐遊行 Emily問過記協主席岑倚蘭，佢就話出席與否係個人意願，而當日屈穎妍亦無現身，點解搞個活動就一定要人出席？佢反而好奇，點解咁多團體唔提，好似報業公會、新聞行政人員協會、報業評議會等，全部都係維護言論自由，當日都無出席遊行，但只係記協被人針對呢，令人質疑係有系統、有組織咁對付記協囉。 佢又話，記協捍衛新聞自由與言論自由嘅努力與堅持係有目共睹。對評論者施予任何恐嚇手段或使用暴力，記協會予強烈譴責，又話言論自由彌足珍貴，喺當下萎縮情况中尤甚，任何人都需要尊重他人，包括與己立場南轅北轍嘅人嘅言論自由。
|
| |
| |
