【明報專訊】立法會議員中，唔少人都有車牌，不時自己揸車方便周圍去，但原來代表工聯會負責交通議題嘅立法會交通事務委員會副主席鄧家彪係唔識揸車！黨友麥美娟(Alice)就挑戰佢，報名考的士牌，話相信自己考到的士牌，阿彪都仲未考到車牌咁話。 原來阿彪早幾年已經立志要考車牌，另一黨友郭偉強就受到阿彪鼓勵，一take pass咁攞到車牌，但阿彪至今仍然未考。佢同Emily講其實已經過咗筆試，但每次要考路試時，都撞啱佢唔喺香港或有嘢做，所以至今都未有車牌。 經常做阿彪同阿強嘅司機、成日開完立法會就車埋兩個黨友嘅Alice，就相信自己考的士牌應該仲快搞掂，不過佢唔係打算轉行揸的士，而係要挑戰阿彪啫！唔知呢個挑戰會唔會對阿彪考牌有激勵作用呢？ Alice話，考的士牌唔使再考路試，只要有車牌3年就有考試資格，考試就係要答100條問有關香港路線嘅筆試。
|
| |
| |
