【明報專訊】發展局最近搞咗個「最喜愛的古樹名木」選舉，畀市民「一人12票」投選古樹名木冊裏面嘅心儀「靚樹」。局方facebook專頁噚日仲有張宣傳圖，模仿緊智能手機嘅即時通訊程式，由「Tree Gum」發選舉圖畀朋友，仲問「要唔要？」，似足政改廣告「有票，真係唔要？」嘅語氣。對方則用3個圖案(一頂帽、一個篩、一條船)嚟表達諧音「無篩選」，但就睇唔到Tree Gum點反應喎。 今次呢張古樹選舉圖，唔少網民留言讚好，仲好眼利咁發現Tree Gum部「手機」顯示住「20:17」，又用剩「36%」電量；有人留言話係代表「2017年」同用咗「64%」電量，認為張圖有唔少政治隱喻咁話。 無論如何Emily都被呢張圖吸引咗。現時古樹名木冊有500幾棵古樹名木，發展局將佢哋分成4個組別，畀市民喺每個組別以至少1票、不多於3票咁選出心儀「名物」。不過，呢批「候選人」都係經政府自2004年起「提名」出嚟，唔知咁算唔算係篩選呢？
|
| |
| |
;){kind=small}
