【明報專訊】財政司長曾俊華前日喺網誌要求拉布議員行開，要求佢哋盡快停止拉布，唔好繼續做鬧劇，又話如果佢哋冥頑不靈，難免有人要出聲叫幾位「行開啦」，引發唔少討論。社民連就反擊，今次仲呼籲網民一齊打電話畀財爺曾俊華，要求佢快啲申請臨時撥款，或者同拉布議員公開辯論。

社民連喺網上整咗幅圖，上面大大隻字寫上曾俊華添馬辦公室嘅電話，發起「全民打電話追債」，要求財爺「開工啦」，包括申請全民退保同申請臨時撥款，社民連形容曾俊華先係冥頑不靈，叫網民一齊打電話及電郵畀佢。

睇番政府公開嘅電話簿，社民連貼出嘅電話的確係曾俊華電話，其實亦都同曾俊華嘅高級私人助理電話係一樣，所以大家肯定唔可能同財爺直接對話，似乎係苦了助理。Emily聽聞，噚日財爺辦公室收到電話數目唔算太多。