【明報專訊】1979年通車嘅港鐵今年踏入35周年紀念，為慶祝生日搞咗個「港鐵心繫生活35周年」展覽，展出多件陪伴市民成長嘅物品，例如第一代港鐵車廂座椅、不同年代車廂扶手及車票。

Emily噚日參觀呢個展覽，展區入口設計成好似一座紅色嘅港鐵站入口，向前行可以見到港鐵第一代車廂不鏽鋼座椅，同埋經典黑色「波波」扶手等。展場最矚目嘅，莫過於當年九龍灣中央控制室嘅模擬控制台，港鐵特登照實物整咗模擬嘅行車路線面板、控制列車走線嘅面板，仲有當年用作與車長、車站溝通嘅控制面板實物，市民可以喺模擬控制台前扮控制員影相留念。

憶無八達通日子 今起德福展出

車票亦係市民坐地鐵嘅共同回憶，港鐵展出兩部舊款售票機模型，同埋不同年代車票設計，畀你懷念未有八達通嘅日子。展場最後嘅拍照區放咗貼紙相機，相片以昔日單程車票為設計藍本，逢周末免費提供即影即有照片。

展覽即日起喺德福廣場展出至4月13日(周日)，5月14至18日再展出，之後分別喺青衣城、將軍澳「PopCorn」及香港站巡迴展出，展期至今年8月1日。