【明報專訊】美國駐港總領事夏千福嚟香港差唔多9個月，廣東話愈講愈好。為咗宣傳「2014我的美國夢比賽」，佢又粉墨登場用廣東話同大家講﹕「嚟啦，親身體驗一下美國呢個充滿機會嘅地方，同時發掘真正嘅美國。」

夏千福拍咗段短片同大家講吓去美國旅行樂趣，例如可以去佢鄉下維珍尼亞州燒嘢食，或者去新墨西哥州食青辣椒。夏千福講咁多，都係為咗叫人嗱嗱聲參賽，佢話如果贏咗比賽，就可以同一個朋友一齊免費去美國。

有興趣參賽嘅朋友，可以用中文或英文製作一條一至兩分鐘嘅短片、寫篇短文或者影一輯圖片集，講吓你嘅美國夢係咩，截止日期5月3號。詳情可以去hongkong.usconsulate.gov/my_american_dream.html睇吓。