【明報專訊】巴基斯坦少女葉慧儀(Bibi)喺香港土生土長，細個全靠多啦A夢先學好中文，不過大家唔好誤會以為多啦A夢用法寶幫佢，其實係Bibi細個成日睇《多啦A夢》漫畫，一路睇一路練寫字，慢慢學識中文嘅。𠵱家喺香港教育學院讀英語教育嘅Bibi，愛做義工，成為今年香港賽馬會獎學金6名得主之一，獎學金約40萬元，係首個獲獎嘅巴籍人士。 巴籍者首獲馬會獎學金 Bibi今年20歲，自小入讀主流幼稚園練得一口流利廣東話，加上漫畫幫助，中文對佢嚟講冇難度。Bibi讀書叻，仲成日做義工，佢去過孟加拉種樹，去過尼泊爾幫村民整排水管，又會返鄉下教書，佢話每次見到小朋友嘅笑容就好滿足。Bibi細個夢想做無國界醫生，但去到中學發現對理科冇興趣，所以改為做「無國界老師」，幫助冇書讀嘅小朋友。 Bibi話父母讀書唔多，所以非常重視教育機會，之前成家人仲一齊決定將巴基斯坦故鄉嘅祖屋租畀教育團體辦學。Bibi會將部分獎學金捐返去裝修間學校，令小朋友讀得舒服啲。
|
| |
| |
;){kind=small}
