【明報專訊】特首梁振英上京述職，原政務司長辦公室專員(特別職務)聶德權，今次亦以候任新聞處長身分跟特首上京。跟過政務司長林鄭月娥，聶處長果然係唔同啲，Emily聽聞聶德權喺北京期間，竟然收到香港電話，問佢有關綜援嘅數字，聶處長亦好幫手，眨吓眼就覆到數據，真係「好打得」！ 林鄭電郵朝早7點收過 終審法院前日就新移民領取綜援資格作裁決。聶德權話，有關新移民綜援等數字其實係公開資料，可能係有啲數字佢比較熟，知喺邊度搵到，所以政府啲人先問番佢咁話！聶德權做過社署署長，之後幫林鄭月娥搞人口政策，熟書一啲都唔出奇。Emily曾聽聞林太會喺半夜電郵下屬，聶德權有無被「轟炸」過？聶德權話，最早都係收過林太朝早7點嘅電郵咋喎。 Emily噚日亦聽到另一件事，就係梁振英前日去紫光閣向總理李克強述職，但臨入去前，成個新聞團隊就被中方限制攝影腳架數目。好彩新聞處長黃偉綸最終「壯烈犧牲」新聞處腳架，畀電視台攜腳架入場，若果唔係，全港市民都可能要睇啲好似地震咁嘅領導人片段。查實今年亦少咗報紙或通訊社可以去紫光閣「聯合採訪」述職，由以往兩個減到一個，地方無變，唔知點解空間小咗？
|
| |
| |
