【Emily】4月自然交配 盈盈無喜
[2020.09.05] 發表
【明報專訊】大熊貓盈盈今年4月同樂樂自然交配(圖)，正當大家等緊海洋公園公布「喜訊」，海洋公園噚日公布，雖然盈盈自7月中起有妊娠徵狀，例如食慾下降、多咗休息、荷爾蒙水平有變等，但8月底開始徵狀逐漸減退，荷爾蒙水平亦回復正常，經過超聲波掃描及專家評估後，確定盈盈無懷孕。
其實成年雌性大熊貓每年發情期後，亦有可能出現典型嘅妊娠徵狀，而假懷孕、母體吸收及流產等亦唔罕見。海洋公園動物及保育執行總監布文傑就話，盈盈、樂樂自9年前開始嘗試自然交配，今年4月第一次成功，係佢哋成長嘅一個重要里程，亦係疫情下令公園振奮嘅好消息，希望盈盈、樂樂喺下個繁殖季節可以再自然交配，相信盈盈、樂樂，以及「百歲熊瑞」安安都期待公園恢復營運後再同大家見面。
更多港聞
【Emily】容海恩訪問大學師兄 黃錦星憶學環保建築
【明報專訊】新民黨容海恩呢排邀請唔同嘅官員同佢拍片對談，前日喺facebook上載同環境局長黃錦星嘅訪問，原來佢哋讀同一間加拿大大學，局長係... 詳情相關新聞
