【明報專訊】民主黨林卓廷上周五喺立法會財委會上，向警務處總警司李雅麗反映警署內隔音設施不足時，其間李雅麗反問佢：「你排過隊(見律師)？」阿廷於是反駁，並舉例反問李「正如你哋(警隊)去放蛇，嗰啲非法賣淫(罪行)，你使唔使去賣過淫呀？唔需要吖嘛係咪呀！」事隔幾日，平機會噚日主動發聲明回應呢番話，稱對阿廷有關言論表示遺憾，仲話可能違反同性騷擾有關嘅條文。 平機會聲明話，有關言論對於當時正討論嘅議題屬「不恰當及不必要」，會令對方感尷尬、受冒犯甚至侮辱，並可能違反《性別歧視條例》內有關性騷擾嘅條文，但由於立法會議員喺議會內嘅言論同表達自由受法例保障，故平機會未能進一步跟進事件，但希望立法會議員以身作則。 阿廷反駁：有晒前文後理 阿廷就回應平機會指摘，話佢呢番說話當時有晒前文後理，係要駁斥警方邏輯，而且個「你」字唔係針對Madam，而係講緊整個警隊，當時Madam都無特別反駁，批評平機會「斷章取義」，亦無畀機會佢回應。阿廷仲話，對比舊年10月何君堯喺立法會內會羞辱毛孟靜「食慣洋腸」，平機會當時聲明亦都無「指名道姓」咁去出聲明反駁，斥責平機會雙重標準，再咁落去只會損害自身公信力。
|
| |
| |
;)
