【明報專訊】48歲防暴警前晚確診感染新型冠狀病毒，佢周二曾經同59名同袍聚餐。好多網民分享呢宗消息，警民關係緊張下，唔少人話「要慶祝」，有人仲希望3萬警員都中招。

最後改成「點解唔聽政府勸喻」

民主黨前晚亦喺facebook分享呢單新聞，仲配上「3萬Thx」嘅字句，但之後帖文一改再改，分別加上「#最緊要人有事」、「#全球首宗人傳狗個案」，然後又改做「人在做，天在看」；最後改成「警察唔係應該絕對服從咩？點解唔聽政府勸喻，避免出席多人嘅聚會呀？」

由民建聯區選落敗者組成嘅「議會監察」，將民主黨fb帖子修改紀錄留晒底，批評疫情當前，昔日「和理非」嘅民主黨居然講埋啲無人性、無血性嘅說話，之後又彈弓手想博大家睇唔到。議會監察仲要求民主黨主席胡志偉回應。

胡志偉：做得唔理想，要同事改

胡志偉同Emily講，相信同事係希望透過fb將呢個信息(警員染疫)分享，但就加入咗自己嘅諗法，相信亦都係講咗香港市民心聲。志偉話噚日知道fb呢件事之後，認為做得唔理想，所以要同事修改。