【明報專訊】立法會換屆選舉9月舉行，行政會議喺2月11日嘅會議上，建議行政長官指令因應通脹，將候選人資助由每票14蚊提高至15蚊，並調高候選人嘅選舉開支限額；而俗稱「超級區議會」嘅「區議會(二)」功能組別，開支上限由上屆嘅693.6萬，增加到760.2萬。相關附屬法例聽日刊憲，2月26日會提交立法會展開「先訂立後審議程序」。 明刊憲 月尾交立會 今次建議提高港島候選人選舉開支上限到266.1萬、九龍東同九龍西同為199.6萬、新界東同新界西為332.6萬。功能組別方面，舉例鄉議局、漁農界、保險界及航運交通界候選人嘅選舉開支上限為13.3萬；超區就係760.2萬。 政制及內地事務局話，每次舉行立法會換屆選舉前都會檢討選舉開支限額，一貫原則係唔可以低至對必要嘅競選活動施加不合理規限，亦唔能夠高到窒礙經濟較不寬裕嘅候選人參選。政府嘅考慮除咗通脹外，仲包括香港人口預計上升3.02%；而2016年換屆選舉，地方選區同功能組別候選人選舉開支中位數，約為開支上限嘅53％至59%不等，但亦有部分候選人嘅開支達上限八至九成。
|
| |
| |
;)
