【明報專訊】武漢肺炎襲港，香港市面口罩難求，唔少政界人士想辦法為市民撲口罩。立法會議員朱凱廸、陳志全(慢必)早前同一眾新任區議員去台灣，其間見咗台灣民進黨立法院黨團幹事長鄭運鵬，提到希望台灣政府喺口罩出口禁令結束後，如果行有餘力，可以出口口罩到香港，「先香港、再中國」；阿廸引述鄭運鵬話，「按人口數和需求數字來看，的確合理」，應承會向台灣行政院長蘇貞昌轉達。

希望台灣出口先香港後內地

鄭運鵬都喺facebook分享有關消息，話同阿廸佢哋傾咗個幾鐘台灣政治議題，本身係高達迷嘅鄭運鵬仲話，香港眾志黃之鋒出唔到境，笑言阿廸佢哋「根本就是來幫黃之鋒看鋼彈(高達)和玩具收藏的嘛！」

幫手揾口罩嘅仲有東區區議員仇栩欣，喺日本都心繫街坊，幫手代購口罩。仇栩欣喺facebook上載相片，平時悉心打扮嘅佢，頭髮散亂，抽住四大袋口罩，佢話遠赴日本為街坊代購，因唔想街坊「食炒價」，仲特意標記「唔知行左(咗)第一百幾十間舖頭」，仲係每間舖頭搵到就買少少。