【明報專訊】港鐵沙中線紅磡站聆訊上周四(2日)再開庭，聆訊由2018年起已經開咗一年有多，平時工程學就聽得多，噚日Emily仲要學埋科普知識，探討泥土有咩成分。 話說噚日總承建商禮頓代表資深大律師石永泰，同政府專家證人、工程師劉志宏博士「交鋒」。劉博士話紅磡站建於地底，周圍水分同空氣可能會侵蝕鋼筋，石大狀聞言就衝口而出問：「邊度有空氣？」劉博士答「梗係有空氣」，反問石大狀點解覺得入面無空氣呢。石大狀答話因為「入面係泥土(That's soil inside)」，劉博士於是反駁話「泥土有空氣」(Soil has air)。石之後澄清話自己指嘅係「compacted soil」，即係畀石屎壓實嘅泥土。 點都好，呢番對話引起喺庭外聽審嘅Emily同行家、旁聽人士大笑。咁到底泥土入面有無空氣？Emily上網搵搵，發現有小學教材介紹過：「土壤是一個多孔體，孔隙裏主要儲存水分和空氣」，教材話雨天時，土壤孔隙大部分為水分佔據，空氣成分稀少，晴天則相反。
|
| |
| |
;)
