【明報專訊】反修例風暴中在葵涌警署外舉槍而喺內地爆紅嘅「光頭警長」劉澤基，同香港警隊代表一行10人獲邀到北京參加國慶70周年活動，行程受到高規格招待，內地唔少媒體都有同佢做訪問。噚日閱兵儀式中，「一國兩制」方陣出場時，中央電視台特別喺人山人海中搵出劉sir，鏡頭影咗佢6秒大頭，片段中劉sir滿面笑容、揮動國旗。佢之後喺微博話，「閱兵！不只是國力的表現！也是國民教育！也是令青年人明白中國今天成就如何努力得來！」 劉sir個微博叫「香港光頭警長」，現時已經有62萬粉絲，單係有關閱兵微博，4個鐘就有14萬人點讚。據微博介紹「香港光頭警長」嘅影響力，單係前日嘅閱讀數量就有逾百萬。香港警隊代表上京後，獲網友送上「萬名網友大禮」，包括保溫杯同祝福冊，劉sir喺微博感謝「同胞」，仲話每一頁都令佢差啲掉眼淚，感謝佢哋對香港警隊嘅支持。 梁美芬合照 「驚喜的意外收穫」 劉sir及同袍喺北京亦成為焦點，早前佢夜遊王府井亦被民眾認出並要求合照；噚日閱兵時，經民聯立法會議員梁美芬特別同一班阿sir合照，佢形容係「驚喜的意外收穫」，其中一張相劉sir仲搭住梁美芬膊頭。 ■明報報料熱線﹕inews@mingpao.com / 9181 4676
|
| |
| |
;){kind=small}
;)
