【明報專訊】噚日國慶70周年，除咗香港代表團，港區人大代表同政協亦獲邀到北京參觀閱兵，唔少人心情興奮。幾名女港區人代陳曼琪(Maggie)、鄺美雲(Cally)等一落車就排排企留影，Cally仲一身軍綠色打扮；Maggie喺閱兵開始前做facebook live，介紹國慶嘉賓袋，內有國旗、兩支水，仲有國旗、心形圖樣嘅印水紙，佢話蔡素玉仲將印水紙印咗上面度𠻹。噚日太陽幾猛，Maggie話雖然曬，但都值得。

全國政協委員吳傑莊話，佢哋朝早6點幾就集合，8點去到閱兵現場，陽光燦爛，佢都有用防曬，所以曬咗5個鐘仍然可以；佢話自己軍事知識唔係好豐富，但了解到閱兵嘅軍備大都係中國自主研發及製造，感覺祖國愈嚟愈進步。

港區人代張俊勇：為港羞恥

港區全國人大張俊勇話，覺得國家好進步，中國由被八國聯軍欺負，到今日做到世界強國，軍事經濟力量舉足輕重，作為中國人好自豪；又話除咗軍備外，群眾巡遊嘅道具好靚，參加嘅人民好活潑。佢話自己都有跟住唱《歌唱祖國》，感慨國家咁強，可惜香港現時情况令人羞恥。