【明報專訊】反修例風波以嚟，警民關係緊張，「香港警察」facebook出帖不時惹嚟網民「畀嬲」，反而警隊喺內地微博就吸引到唔少支持。其中一個有份開微博嘅阿蛇，就係7月30日晚葵涌警署被圍，持霰彈槍指向人群嘅警長劉澤基，佢喺微博化名「香港光頭警長」，上星期一(16日)開始出帖，到噚日已有43萬粉絲，相當「吸粉」。 《環球時報》日前一篇報道話，統計最少10個本港警員開咗「微博」，報道仲引述一個有2萬幾「粉絲」嘅警員話「感受到內地同胞熱情，聽到他們支持的聲音，以往孤獨的香港警察頓時覺得十分溫暖」。 至於劉澤基嘅微博，除咗會講市民送嚟嘅禮物，例如月餅同油畫等，亦抒發對時事睇法，好似前日立法會議員何君堯發動全港清潔日，佢就發帖大讚對方「真正為香港好」。 付國豪獲環時10萬獎金 另外，環時總編胡錫進喺微博話，該報召開「香港報道表彰會」，8月時喺香港機場被示威者圍困同綑綁嘅付國豪獲得10萬元人民幣嘅最高獎。胡錫進話付國豪就職於環球網，收入唔高，租房住，屬典型「北漂」。大家會上開玩笑話希望呢10萬蚊獎金為佢帶嚟好運，令佢可以喺北京買樓同娶老婆。
|
| |
| |
;){kind=small}
;)
