【明報專訊】唔少社會賢達近月都為香港局勢發聲，前財爺曾俊華噚日撰文反問大家要繼續互相指摘，抑或願意放下仇恨重新對話；佢形容既然大家係一家人，就有可能做到最難嘅寬恕、和解，又引述印度聖雄甘地所言「以眼還眼，只會令天下盲目」。不過呢篇文受到唔少人質疑，其中中大學生會前會長王澄烽就話「我們都是一家人」、「寬恕與和解」道理永遠唔會錯，但同現實就有萬丈鴻溝。 王澄烽噚日喺fb寫長文回應曾俊華，反問「你媽媽會否說你no stake in this family？你哥哥會否打到你頭破血流和爆眼？你爸爸會否動輒就找福建幫和解放軍恐嚇你？ 」又質疑如果對方係爆眼少女嘅家人，會唔會寬恕毫無悔意、歪曲事實嘅警察。 信真心關懷 冀易地而處 王澄烽話示威者如果退讓妥協，香港將會迎來史無前例嘅大搜捕；如果政權、警方一日唔為打壓付代價，一日都無可能有和解。佢話相信曾俊華對年輕人嘅關懷同憂心係真心誠意，但認為年輕人需要嘅並唔係安穩現狀，而係有自由民主嘅未來。
|
| |
| |
;)
