【明報專訊】反修例風波未息，已引伸到市民關注政府管治問題。民主黨立法會議員涂謹申噚日就話，現時大部分行政會議成員都冇公信力，政府應該大幅度改組，除咗建議加入運輸及房屋局前局長張炳良、終院前首席法官李國能等人外，仲建議政府不如嘗試同「KOL(關鍵意見領袖)」對話。
阿涂明言，新民黨主席葉劉淑儀、民主思路召集人湯家驊嘅言論只會令人更不信任政府，遲一日換都等唔到。佢又話就算特首林鄭月娥唔辭職，都應該喺能力範圍內撤換幾個司局長，最少包括律政司長鄭若驊、保安局長李家超，形容兩人做落去，市民都未能產生任何信心，「只會見到佢哋前面、嬲到後面」，佢哋講句說話都只會令市民覺得「垃圾又講嘢喇」。
;)
