【明報專訊】全國人大會議噚日開幕，每年港區人大代表開會前都會喺北京人民大會堂外影張大合照，不過今年就唔多齊人，因為港區人大代表鄭耀棠同王敏剛都身體抱恙請咗假，港區人大常委譚耀宗同人大團長馬逢國則因為開會行另一邊通道，無影大合照。Emily噚日致電棠哥嘅香港號碼，一直未能接通。

人民大會堂每年都係人代、政協嘅打卡影相位，不過今年人代開會唔准帶手提電話入內，唔少人影完相，都要乖乖哋將電話放番上車。港區人代喺北京飯店開小組會議，就可以帶埋電話，唔少人代都有喺開會前影番幾張合照，好似鄺美雲咁，就將同蔡素玉、吳亮星、黃友嘉等港區人代嘅合照上載到微信朋友圈，分享靚相之餘，亦表達對於人大會議開幕，聽取政府工作報告後嘅感想。

過去兩會開幕另一特色係「兩會藍」，無論北京天氣、空氣點樣，人大開幕當日天空都會好藍，不過近日北京空氣污染嚴重，唔少人外出都要戴口罩，噚日雖然勉強有「兩會藍」，但相較以前都比較失色，從人民大會堂遠望出去，其他地方仍係一片灰濛濛。